THE STORY (Part 1)

Michael Xaia

Tlangval kum 42 mi ka ni a. Tlangval tia han koh atan chuan kan upa lam lek lek ta!! Mahse mi tam tak te'n tun thlenga ka la tlangval chhan hre lova min lo chhhaih fiam fo chang pawhin ka zak lova. Zah ahnekin ka inchhuang ru veng veng zawk thin. Ni e, a chhan chu hre ve ngat la chuan min chhaih fo lo ang a, chutih ahnekin a khawngaih te pawh min khawngaih ve hial mahna! Mahse kan nuna thil thleng zawng zawng hi midang hriat ve vek a lo tul kher lova. A chhan hre lova min chhaih fo tu te pawh hian hrelo chhunzawm zel mahse pawi pawh ka ti lem lo. Mahse hei, tunlai chu ka tunhma khawsak duhdah thinna te khan mi rawn rulh an tum emawni tih turin ka hriselna leh khawsak phung te'n hniam lam an pan zel mai a. Mi hrisel tak tia sawi tur ni mah suh i, a dam hi chu ka dam tha ve viau thin asin mawle. Vanglai hun kan hmang chho ve dawn chauh emaw tih laiin tar lam kan hnaih sa nghal run mai chu anih hi. Mi tam tak chuan Pathian hremnaah te pawh an chhuah thla leh rawk ang chu mawle!! Mahse heti-ang lam hi ka rin ve vak loh thil anih avang erawh chuan ka buai teh chiam lem lo. A reng reng thu-ah dam kim mang si lova dam reng han thlakhlelh em em nachhan tur pawh awmin ka hre lem lo. Chuti-ang teh nuai ka nih avang chuan ka kalbo tak tak hnua kei leh ka hmangaihte hming a lo hliau nasat lutuk loh na'n tiin ka chanchin leh awmdan i hriatloh tam tak, i hriat ve awma lang te ka han hrilh duh che a. Nakinah mite'n chil min lo chhak hun pawh-a nang chauh tal chuan thudik i lo hriat ve hi a tul ka ti em em si a. Kim lo tak mah nise, pawimawh ka tih zual ho tal hi chu han lawrkhawmin ka han hrilh ve che a ni ang chu.

Khatia tlangval ka han hriat chhoh tirh, tleirawl hawklak mai kan la nih lai khan ka theih tak emaw tiin khawvel kha mumal nei lem hlei lovin ka han khuainuai chho ve ta mawp mawp kha ania!! A lo atthlak theih ngei mai. Ka naupan lai atang tawha ka ngaihsan tawp theih loh 'Cowboy' nunchan dan zawng zawng te kha a tak tak a han hlenchhuah a, han nunpui kha ka tum tehreng a nih kha. Rin ai chuan a lo har phian mai. Inti Cowboy laklawh ta na na na chu ka han Cowboy rem rem khawp a(h)!!! Min zilh tu tur Pa ka neih miau loh avang khan 'Nu Hmangaihna' khan min khul chhuah tumin theihtawpin a bei a. A tha ber ka eiin ka in lovang tih hlau reng reng in rim takin min thawh sak a. Theihtawpin thu tha ber ber pawh min hrilh thin mahse ka thinlung a dek pha ngang si lo. Hmeichhe ngaihsan lohna a khat ta na na na chu hmeichhe thu te mai mai kha zawngin ka beng rawng pawh a thleng pha lo. Mahse, Unanu zinga a tihmawh leh awm tha duhlo hlawm hlak ni mah ila, Nu hmangaihna kha chu a lo thuk em mai a, engtiklaimahin min ensan ngai lo. Tun hnua ka ngaihtuah leh hian kha huna kir leh a, kha tleirawl mawl tawpkhawk kha va zilhhau hrep hi ka chak thin ngawt mai. Mahse thil ni tawh chu a nihna anga kan liamtir mai a ngai si a. A pamhmai ngawt mai!!

Engtin tin emaw ni, ni e, engtinnge ka lo seilen chhoh zel tih pawh ka hre love!! Sawrkar dana puitling 'Vote nei thei chin' ka lo nih hnu lawk khan sawi pawh zahthlak khawpa sual lian ka han khawih ta mauh mai anih kha. Kha thil ah khan zawng midang chu ka sawi thei lova, mahse ka nu kher kher kha chu demna tur pakhat mah ka hre lo. A thu awih duh lovin ka tlanbosan lui a, ka chunga thil thleng kha chu ka mawh liau liau a ni e. Keima mawh liau liau....Engang pawhin sualin engang pawhin khawlo mah ila, mi dang zawng zawng te hmuhsit leh engdawng pawh ni ila, ani kha zawngin hmangaihna tawp lo khan min hmangaih reng thin asin. Min hmangaih ka tih hian tunlai thangthar ho in hmangaih an tih nen hi chuan a inanglo nasa a nia. Kha hmangaihna, tuna ka sawi hmangaihna hi chuan ka tana tuar a, thih hial pawh a hrehlo. A hrehlo pawh a ni mai hleinem, a duh ngawih ngawih a, a chak ngawih ngawih zawk asin!! Mahse Cowboy chu Cowboy kan ni. Kan thiltih man chu keimahni ngeiin kan pe tur a ni a. Tuar a tul a nih chuan kan tuar ang a, thih hial pawh tul sela kan thi mai ta lawng!!!

Tichuan i hriat ang khan kum 20 em pawh ka la tlin hmain Kum 10 tal tap mai parole nei map lovin tan inah min khung ta anih kha!! Tanin(Jail) a ka awm chhung pawh khan inngaihtuahna hun tam tak ka nei a. Mahse, ka sawi tawh ang khan ka lo inlak Cowboy ve laklawh tawh miau avangin ka rilru ka tisak lui tlat a. Ka thiltih tawh leh ka nun dan te kha engang pawhin siamthat duh mah ila a theih dawn chuang loh tih kha ka inhrilh nawn fo a. Inchhirna pawh neih loh kha ka thil tum lian ber a ni. Mahse maw, khatih hunlai khan engang pawhin inti pachangin inti pa mah ila, mihring ve bawk ka nih miau avangin rilru a lo sak reng thei lova. Chutia ka rilru no a chhuah ve lai te chuan nupui fanau hmangaih tak leh min hmangaihtu dik tak mai han tawn a ka hringnun hman ve tawh te pawh ka suangtuah thleng ve fo asin. Mahse ngun taka ka han ngaihtuah nawn leh khan "Mi, mahni chauhva zin kawng zawh tute chu an nihlawh e. Tibuaitu nei lovin chak takin an kal thei thin si a" tih khan min hneh leh zawk thin mai pawh a. A reng reng thu ah keini ang misual te chu tu'n nge maw min han duh ve ang a, min nei ngam reng reng ang le tiraw??? Makpa awhawm loh ber ka ni ang tih chu tu sawi leh hranpa mah ngai lovin min dahna hmun hian a tilang chiang em mai. Chu vang chuan heti-ang lam hi chu ngaihtuah ve lo law law ila ka tan leh midang tan tak pawh hian a tha ange tih chu ka thu tawp a ni deuh ta tawl mai e.

(A thawh dan azirin kan la chhunzawm mahna...!!!)