Letter to My Father (Part - II)

Ka Pa Duhtak,

He hringnun hmachhawn tur a inrintawkna leh huaisenna min lo zirtir avang in lawmthu ka hrilh hmasa duh che a,harsatna in a hrualfe,manganna in a fiah,retheihna in a kai kun zawhloh a min lo chherchhuah avang hian vawiin thleng hian ka lawmna a la tawp thei lo a ni.

He ka hringnun hian lawm leh lungngaih chang atawn nite hian ka ngaih che hi a zual thin a,rorelna leh thutlukna liamtham siam a lo ngaih changte hian i thlazar hnuaia awm ka la chak fo thin a sin. He mawhphurhna hi ka ko a engvanga nghat nge i nih a,min rintawk vang nge,min rin tawh vang ka la hrethiamlo a ni.

Kumpuisul lo vei in naupian chamte pawh a lo thleng dawn ta a,kan kawmthlang tlaizawngte pawh khan parfung chawiin,an mawina zawng zawng te nen an parvul leh ang a,thliahlai nghak in an parvul leh ngei ang. Sirva ten a zu dawt tumin an rawn bel leh ngei ang a,hlimtaka lenlai chen in tlai leh puar taka an tlan bik tur ka ngaihtuah in,kan kawmthlang savate pawh tluk tawhlo a riahrun ka vai bik tur hi chu a pamhmai lu deuh chuan ka hria.Khang tlaizawng leh kan huan par leh kung zawng zawngte kha ka tan chuan biakbuk thianghlim ang tluk hial in an zahawm a sin,ka lungchhiat leh lungngaihna min chhawkzang tur a khuanu min pek ah siar ka ngai a sin.

Heng khawpui ri nuk nuk leh thawm bengchheng chitin reng ten ro an relna hmun ah hian khawvel mawina leh duhawmna kei chuan hmuh tur ka nei ve lo a,kan kawmthlang huan a sirva leh phengphehleng ten nunchan an zirna hmun leh zingni chhuak thiang mawi tak hmuh theihna leh zing tiauchhum in a bawm var luk tiau dungte,khawchhak tlangdung fiah fel fai takte,romeiin a bawm pawt chiai chhak kawlrawnte khan siamtu kutchhuak mawizia leh ropui zia min hriattir zawk a sin. Heng khawpui thawm bengchheng chitin reng hriat theihna hmun ai chuan kan kawnthlang hauhuk hualreu ri tak ngial pawh khan ka lairil lunglen an hnem zawk a sin.

Khang hmun leh thilte kha ka thinlung maicham an nih miau avang in sum a lei leh hralh theih pawh ani loa,engzat pawh chhiar in hralh pawh lo ni se,he ka thinlung ah hi chuan hralh a ni ngailo ang.A ramri leh huam chin kha ka ta a la ni reng a sin,he hringnun nunrawng hian engtiang pawhin a nunrawn chhuh in min hran khum mahse leitheih leh hralh theih a ni chuang heklo ang.

I hringnun lo chawhnu in,chaklohna leh bawrhsawmna ten an tlakbuak che ang a,mangang leh beidawnna i la tawk ngei ang,hmangaihtu a i hriatten an la phatsan chek ang chia,chutih hun chuan inthlahrung lo in nangmah ngai em em thin tu i fapa hi ka awmreng a ni tih i lo hre dawn nia.

I fapa

 (Credits - Lalchansanga Mampuia)