(I would like to dedicate this article to my dearest friend Michael Zaithanpuia,cause someone who left him in this sad sad world without tuning the sweetest love song - Lalchansanga Chinzah Debilo)
Zanthiang reh ruai mai hnuai ah chuan phulah mu in vana arsi te chu kan thlir dun a,ka bulmai a awm ni si in a thinlung chu ka ta a ni tawh si lo,hmanah kha chuan he hmun ah ngei hian lungchim leh ihthlahlel takin kan inpawm vawng vawng a,tunah lem inhnaih tak ni si in a thinglung erawh hmundang ah a awm daih si,tu thiamloh nge ni ta ang le?
Hun kalta te chu ka chhutlet neuh neuh a,kan awm a bei a hmangaihna biahthu kan hlan dunlaite kha ka ngaihtuah a,kumtam pawh a la liam lo,a hmui a ka fawhna em pawh a la hul lo ang tih a midang ta a lo ni mai tur hi tuarthiam har ka va ti em! Mahse khuanu ruat a ni ang e tia tawrh dan thiam ka zir mai loh chuan ka tan khawvel ah hian damchhan a awm tawhlo,ka innghanna leh hmangaih ber midang ta a ni mai tur chu hriatthiam ka tum ngial pawn a har ka ti lu deuh a ni.
Ka bula ka hmangaih ni thin chu ka va melh phei a,min lo nuih sen sen a,hmana a nuihmawi ang tho khan a nui a la mawi a,a hmelte chu chu zan thla eng noruai hnuai ah chuan a tha zual emaw tih mai tur a ni.Nghet taka kuah in ka hun remchang neih hnuhnun tur a ni tih hria in am tak in a tawp ber nan ka fawp vawng vawng a,ka lawm vang nge ka thinlung nat vang ni ang ka biang ah chuan dan zawhrual loh in mittui a raw luang zawih zawih a,a hma aia nghet leh zual in ka pawm a,a ni pawh chuan min rawn kuah in kan pahnih chuan kan mittui chu a luang zung zung a.Inti pachang in ka mittui ka hruhul a,a bianga mittui luang ngiai chuan ava lan duhawm tir em! Mahse kumkhua in ka tan chuan lakphak loh tur a vana arsi ang mai a lo ni tawh dawn si a.
Tawngtum in a ka a ang zuai a,ka kut in zaizir in ka hrilh a,keimah zawk chuan ka thinlung chu leih buakna hun tawp ber a nih dawn vang in he hun hi ka ren in ka ngaihlu a ni,thuthmun remtha in ka thinlung tawt up up leh lungngaihna tlakbuak chu thawihdam ka tum ta zawk a, “Bawihpui,sawithiam phakloh leh ka ngaihtuah thiam bak in ka hmangaih che a,i tan chuan ka nei engkim leh ka nunna hial pawh hi pek che ka huam a sin,engvang nge i thinlung atanga chhuak tura min tih tak mai le,ka hlimna leh ka lawmna chu nang chauh i ni a,beiseina min siamtu leh ka nun min pawt kaltu chu nangchauh i ni a sin,mahse ka lo suangtuahna leh beiseina chu thal romei ang in i zamral tir ta si a,mahse ka hmangaihna che hi a chuai mai danlo a,eng ang pawh in khawsa in mi ta pawh lo ni la,ka thinlung a pindan ka roh ber i luah tawh miau avang in ka chhuahtir phal tawh lul lo che a ni.hringnun zinkawng ah hian i hlim renglo mai thei a,tahchang leh lungngaih changte i la tawng chho dawn chauh a,hnemtu leh tlukluhna i mamawh a,mal riau a i inhriat a he khawvel hi ruak ta riau a i inhriat hunah pawh chutih hun chuan i tan kei hi ka inhawng reng a ni tih hria la,hringnun hian hlimna leh lawmna a pek loh che a,lungchhe vankai a i awm hunah pawh’chutih hun ngeiah chuan i tan ka awm a ni tih hi i lo hrechhuak thin dawn nia” ti in ka sawiduh chu lungchim taka pawm vawng vawng chungin ka hrilh a,hnuailam a melh a,a mittui a far fap fap a,duat taka kuaidak in a biangah chuan ka fawh sak ta ngawih ngawih a.
Mittui tla par chung chuan he thu hi min hrilh a, “Ka hmangaih leh duhber i ni a sin,thiamna runsang beltur a min liamsan ni khan awmkhua a harin,lamang i let leh ni tur thlir in ka lo nghak che a,i thaikawi bawngte leh ritling darzam palai i rawn tirh ring in ka lo nghak che a,nangchuan min hretawhlo ni awm tak in i reh ta hmiah a,ka thiante lah chuan lengdang tang i belh thu leh i hlim thu an sawi ta mai si a,ka awih lo in rinthiam harsa ka ti,thlakhat tal ka nghak leh teh ang ti in ka hmangaihna che avangin chhelna ka insiam chawp a,mahse nghahchhuah ni reng ka nei thei silo a,ka hmangaihna che avang in ka tello a hlimna i hmu dawn a nih phawt chuan ti in hmangaihna mittui nen lengdang tang ka bel ta a sin,khang hunlai a ka rilru nat zia kha min hriatthimpui la chuan vawiin ni hian hetiang dinhmunah hian kan awm hauh lo ang,mahse i mi ngaihsakna leh hmangaihna chan ve ka lo thlakhlelhna zawng zawngte chu tiauchhum ang mai a boruaka thamral an lo chang zo ta si a,rilruna leh ngai em em chungin ka liamsan ta che a ni’ a han ti chuai raih mai chu ka baihvaiin sawitur a ber pawh ka hrelo,ka lehkhathawn zawng zawng te kha danglo in khawi ah nge a chamban tak ang,vawi tamtak biak ka tum a,ka hlawhchham thin ziate ka hrilh chuan awihngam chiah si lo in min en hau a,mahse thutlukna a siam tawh chu sut leh atan a mawi tawh si lo,midang ta ni tur in naktuk mai hian khiang min awihsan tawh dawn si a.
Ka nunah hian zirlai harsa ka tih leh thiam har ka tih ber midang thinlung tak zet a hmangaih min zirtir a,he ka trhil zir chhuah hi tunge chhunzawn ta ang,tunge ka rin ang a,tunge ka hmangaih ngam tak ang le,hmangaih neih leh hi ka duh tawhlo a sin,nang ka hmangaih che hi ka tan chuan hringnun damdawi,nun hlimna leh beiseina thar min siamtu a ni a,lungngaih leh beidawnna in min bawm thin changte hian min khalh kaltu leh harsa chung chung pawha ka beih hram hramna chhan i ni a sin,mahse kirleh rual loin mual min liamsan ta si a maw,anat hian ka na vawng vawng a ni.Sam ang kan inthennan kawl a eng ta si a.
Zanlai a ni dawn ta der mai,mi nupui ni mai tur awmfal pui reng pawh thilmawi a ni a ka hriatloh avang in,ui tak chungin ka thlah a ngaita si a,a liam tur chu a lan theih chhung ka thlir ta a.Ka ngaihtuah let leh hian khang lehkhathawn zawng zawng kha tu kut ah nge a thlen tak ang,tunge kan inthenna tur a hmala ta ang le,vawin thleng hian ka la hrechhuak thei lo a ni.
Ka hmangaih ber pasal neih ni chuan engmah reng ka rilru ah a lang theilo a,a thiante hmel ka hmuh leh hlim taka kan lenho laite ka rilru ah a rawn lang a,a chhungte ka hmuh leh ka rilru natna a zual a,kha ni tluk a hrehawm tih leh rei tih kha ka neilo,ka hun chhiar tin mai chu ka hnen atanga a kalbona hun ti seitu mai an lo ni si a.He khawvel hi a va nunrawng em,ka tan hian hlim ni leh lawmna ni hi a herchhuah pui ve hi a tum ve ta lo a mi le!Hun a her pauh leh ka ngaihna a zual a,nula leh tlangval hlim taka an han inchhai rial rial lai ka hmuhte hian kan nunhlui mualliam hnute min chhuikir tir a,nupa hlim taka an fate an kai ka hmuhte hian kan pahnih in hetiang ang hian fate nen hlim takin inkai ve rial rial ila ti in ka suangtuah fo thin,ka hmuhtheih leh hriatte hi ka hmangaihna che leh ka ngaihna che ka thinlung a ti thar zualtu an lo ni ta si a,ka nunna hian he ka lei taksa hi a luah a,hring ka chan chhung chuan ka hmangaih reng fo ang che.
No comments:
Post a Comment